Inyeshamba nyinshi zirwanya ubutegetsi bwa leta ya Centrafrique zahungiye mu gihugu cya Repubulika Iharanira Demokarasi ya Congo nyuma yo kuraswaho n’ingabo z’u Rwanda
Ibi byatangajwe n’umuyobozi wa teritware ya Ango ho mu Ntara ya Bas-Uele, muri Repubulika Iharanira Demokarasi ya Congo.
Uyu muyobozi yavuze ko abarwanyi benshi barwanya ubutegetsi bwa Repubulika ya Centrafrique ko bisutse ku bwinshi ku butaka bw’iki gihugu bafite n’imbunda nyinshi.
Avuga kandi ko izi nyeshamba zimaze iminsi irenga irindwi ziri guhungira muri ibi bice zihunze ibitero zagabweho n’igisirikare cya Centrafrique zifatanije n’izu Burusiya n’ingabo z’u Rwanda, RDF.
Yakomeje avuga ko izi nyeshamba zimaze kugera mu bice byinshi byo muri iyi ntara ya Bas-Uele, avuga ko zahageze zivuye ahitwa Zemio na Mboki, muri Centrafrique.
Yagize ati: “Inyeshamba zo muri Centrafrique zinjiye ku butaka bwacu zivuye muri Zemio na Mboki.”
“Zimwe zinjiriye ku mupaka wa Repubulika Iharanira Demokarasi ya Congo na Centrafrique muri teritware ya Ango, izindi zinjirira muri teritware ya Bondo.”
Yakomeje avuga ko “Mu minsi mike ishize, Abarusiya n’Ingabo za Centrafrique na RDF bemeranyije kurwanya izi nyeshamba zikorera muri Zamio na Mboki.”
Bivugwa ko izi nyeshamba ko zatangiye guhungabanya bikomeye umutekano wo muri izi teritwari, kuko ngo abazituyemo batewe ubwoba n’imbunda ziri kwinjirana ku butaka bwa Repubulika Iharanira Demokarasi ya Congo.
Yagize ati: “Umutekano wahungabanye cyane muri Ango na Bondo, abaturage bafite ubwoba kuko izo nyeshamba zambuka, ziba zifite amasasu n’imbunda ziremereye mu ntoki.”
Abaturage baturiye ibyo bice banabwiye itangazamakuru ko izi nyeshamba ziri gushimuta Abanye-Congo, ndetse kandi ngo zigasahura imiti mu mavuriro n’ibindi.